साऊथ स्टार नागा चैतन्य आणि गर्लफ्रेंड शोभिता धुलिपाला यांचा साखरपुडा आज पार पडला. गेल्या अनेक दिवसांपासून दोघांच्या नात्याची चर्चा सुरू होती. अखेर या चर्चा खऱ्या ठरल्या आहेत. दोघांच्या साखरपुड्याचे फोटो समोर आले असून दाक्षिणात्य पद्धतीनं साखरपुडा पार पडला.
समोर आलेल्या फोटोत दोघांचा दाक्षिणात्य पारंपरिक लुक दिसून येतोय. नागा चैतन्यचे वडील नागार्जुन यांनी दोघांच्या साखरपुड्याचे फोटो शेअर केले. तसंच एक खास पोस्टही लिहिली आहे. माझा मुलगा नागा चैतन्य आणि शोभिता धुलिपाला यांचा साखरपुडा पार पडल्याची घोषणा करताना मला प्रचंड आनंद होतोय. आज सकाळी ९.४२ वाजता हा सोहळा पार पडला. शोभिताचं आमच्या घरात स्वागत करतानाही मला तितकाच आनंद होतोय. दोघांना नवीन आयुष्यासाठी शुभेच्छा.
काय म्हणाली होती शोभिता?
दरम्यान,काही महिन्यांपूर्वी नागा चैतन्यसोबत रिलेशनशिपमध्ये आहे की नाही असं विचारल्यावर शोभिता म्हणाली होती की, ‘ही माझ्या आयुष्यातली वैयक्तिक गोष्ट आहे. माझ्या आयुष्यात काय घडत आहे हे मला इतर कुणासमोरही स्पष्ट करण्याची गरज नाहीये. माझं आयुष्य सार्वजनिक नाही. मला माझ्या आयुष्याबद्दल बोलण्याची किंवा काहीही स्पष्ट करण्याची गरज वाटत नाही, वाटली नाही.’
दरम्यान, तीन वर्षांपूर्वी सामंथा रूथ प्रभू आणि दाक्षिणात्य अभिनेता नागा चैतन्य यांच्या घटस्फोटाच्या बातमीनं चाहत्यांना मोठा धक्का बसला होता. दोघांनी सहमतीनं घटस्फोट घेतला. या घटस्फोटामागचं नेमकं काय कारण होतं? हे मात्र अद्यापही समोर आलं नाहीये. असं असताना तीन वर्षानंतर नागा चैतन्य यानं आयुष्यात पुढं जाण्याचा निर्णय घेतला
सामंथा आणि नागा चैतन्य यांनी लग्नाच्या चौथ्या वाढदिवसानंतर काहीच दिवसांनी ऑक्टोबर २०२१ मध्ये एकमेकांपासून वेगळं होत असल्याचं जाहीर केलं होतं. सोशल मीडियावर या दोघांनी संयुक्त निवेदन प्रसिद्ध करत त्यांचा निर्णय जाहीर केला होता. त्यावेळी त्यांनी दोघांमधील मैत्री कायम राहील असं सांगितलं होतं परंतु घटस्फोटामागचं कारण मात्र त्यांनी जाहीर केलं नाही
शोभिता म्हणाली होती की, ‘माझा चित्रपटसृष्टीशी काहीही संबंध नव्हता. मी ऑडिशनच्या माध्यमातून अभिनयक्षेत्रात प्रवेश केला. एक मॉडेल म्हणून जाहिरातीसाठी ऑडिशन देऊ शकता तशा मी १००० ऑडिशन्स दिल्या.’ गडद त्वचेच्या टोनमुळे शोभिताला ऑडिशन्समधून रिजेक्ट करण्यात आलं होतं. त्याबद्दल एका मुलाखतीमध्ये शोभिताने सांगितलं की, ‘जेव्हा तुम्ही पहिल्यांदा सुरुवात करता तेव्हा एक लढाई असते. मी चित्रपटातील नाही. पण मला आठवतंय माझ्या जाहिरातीच्या ऑडिशन दरम्यान मला अनेक वेळा सांगण्यात आलं होतं की, तू ‘गोरी’ नाहीयेस. जाहिरातींमध्ये दिसण्यासारखी सुंदर पण नाही आहेस असं मला सरळ तोंडावर सांगितलं गेलं होतं.’
