सिनेमागृहानंतर OTT वरही येणार आदिपुरुष, प्रदर्शित होण्यापूर्वीच झालाय कोटींचा करार
प्रभास, क्रिती सेनॉन आणि सैफ अली खान अशी तगडी स्टार कास्ट असलेला ‘आदिपुरुष’ हा चित्रपट सिनेमागृहात प्रदर्शित होण्यास एकदम सज्ज आहे. ओम राऊत यांच्या दिग्दर्शनाखाली बनलेल्या या चित्रपटाची चाहते आतुरतेने वाट पाहत आहेत. चित्रपट प्रदर्शित होण्यापूर्वीच त्याच्या व्हीएफएक्स, सिनेमॅटिक एक्सपिरिअन्स आणि रामायणचे आधुनिक रूपांतर याबद्दल बरीच चर्चा झाली होती. तसेच या सिनेमाच्या ओटीटी रिलीजबाबत अनेक अंदाज बांधले जात होते. आता हा चित्रपट कोणत्या OTT प्लॅटफॉर्मवर स्ट्रीम केला जाईल आणि निर्मात्यांसोबत किती कोटी रुपयांचा करार झाला आहे याबाबत नवी माहिती समोर आली आहे.
आदिपुरुष हा चित्रपट येत्या १६ जून २०२३ रोजी सिनेमागृहात प्रदर्शित होणार आहे. त्यानंतर सुमारे ५० दिवसांनी प्रेक्षक हा चित्रपट OTT प्लॅटफॉर्मवर पाहू शकतील. मीडिया रिपोर्ट्सनुसार, निर्मात्यांनी ओटीटी रिलीजसाठी करार फायनल केला आहे.
अॅमेझॉन प्राइम व्हिडिओवर आदिपुरुष
मिळालेल्या माहितीनुसार, आदिपुरुष या चित्रपटाला त्यांचा ओटीटी पार्टनर मिळाला आहे. रिपोर्ट्सनुसार, ‘आदिपुरुष’ अॅमेझॉन प्राइम व्हिडिओवर प्रदर्शित होणार आहे. तब्बल २५० कोटी रुपयांच्या करारा सह चित्रपटाला ही मोठी डील मिळाली आहे.
प्रदर्शित होण्यापूर्वीच करोडोंची कमाई
चित्रपटाने संगीत, सॅटेलाइट आणि इतर डिजिटल अधिकार विकून आतापर्यंत तब्बल ४३२ कोटी रुपये कमावले असल्याचे म्हटले जात आहे.
चित्रपटाबद्दल बोलायचे झाल्यास, हा सिनेमा सुरुवातीपासूनच चर्चेत होता. अनेकदा चित्रपटासंबधी वाद देखील निर्माण झाले होते. या चित्रपटात साऊथचा सुपरस्टार प्रभास प्रभू श्रीरामाची भूमिका साकारणार आहे. तर बॉलिवूड अभिनेत्री क्रिती सेनॉन सीतेच्या भूमिकेत दिसेल. अभिनेता सैफ अली खान लंकापती रावणाची भूमिका साकारणार आहे. तर मराठमोळा अभिनेता देवदत्त नागे हनुमानाच्या भूमिकेत पाहायला मिळेल.
