पुण्यात फुल्ल राडा, काँग्रेस कार्यकर्त्यांनी लोकल अडवली; भाजपवाले काँग्रेस भवनमध्ये घुसायले

 नॅशनल हेरॉल्ड प्रकरणात श्रीमती सोनिया गांधी आणि विरोधी पक्षनेते राहुल गांधी यांना देण्यात आलेल्या नोटिशीच्या निषेधार्थ युवक काँग्रेसने (Congress) खडकी रेल्वे स्टेशनवर लोणावळा-पुणे लोकल ट्रेन अडवून आपला रोष व्यक्त केला आहे. एकीकडे काँग्रेस कार्यकर्ते रस्त्यावर उतरले असताना दुसरीकडे भाजप (BJP) समर्थकही आक्रमक झाले आहेत. पुण्यातील भाजप कार्यकर्त्यांनी काँग्रेस भवनची वाट धरल्याने काँग्रेस आणि भाजप समर्थक आमने-सामने आले आहेत. पुण्यातील (Pune) बालगंधर्व चौकात हा राडा सुरू असून मोठा पोलीस बंदोबस्त तैनात करण्यात आला आहे. काँग्रेस भवनमध्ये आम्ही जाणारच, राहुल गांधी-सोनिया गांधी यांना अटक करा, अशी भूमिका भाजप समर्थकांनी केली आहे. तर, काँग्रेस समर्थकही काठ्या घेऊन रस्त्यावर उतरल्याचं दिसून येत आहे. 

नॅशनल हेरॉल्ड प्रकरणी भाजप कार्यकर्ते आक्रमक झाले असून पुण्यात काँग्रेस भवनच्या समोर भाजप युवा मोर्चाकडून आंदोलन करण्यात येणार आहे. त्यासाठी, भाजप कार्यकर्ते बालगंधर्व चौकात जमले असून काँग्रेस भवन बाहेर मोठ्या प्रमाणात पोलीस बंदोबस्त तैनात करण्यात आला आहे. बालगंधर्व रंगमंदिरापासूनच पोलिसांचा बंदोबस्त लावण्यात आला आहे. काँग्रेस भवनावर भाजपा युवा मोर्चाच्या कार्यकर्त्यांना पोलिसांनी अडवले आहे. त्यामुळे, पुण्यात नॅशनल हेरॉल्ड प्रकरणावरुन जोरदार राडा पाहायला मिळत आहे. काँग्रेसने 2000 कोटी रुपयांचा घोटाळा केला असून आता फेक नेरेटीव्ह पसरवण्यात येत आहे. त्यामुळे, सोनिया गांधी व राहुल गांधी यांना अटक करावी, अशी आमची मागणी असल्याचं भाजप समर्थकांचं म्हणणं आहे. 

दरम्यान, काँग्रेस विरोधात थेट काँग्रेसभवन समोर भाजपकडून आंदोलन करण्यात येत असल्यामुळे काँग्रेस कार्यकर्ते इथे सुद्धा एकवटले आहे. काँग्रेस भवनमध्ये काँग्रेस पदाधिकारी, कार्यकर्ते बसून आहेत. तसेच, काँग्रेस भवनमध्ये काँग्रेस कार्यकर्ते जमायला सुरुवात झाल्याने पोलिसांसमोर मोठा पेचप्रसंग निर्माण झाला आहे. मात्र, पोलिसांनी भापपच्या काही समर्थकांना ताब्यात घेतलं आहे.